29 August 2014

Back To School Wardrobe Essentials | القطع الأساسية في خزانة ملابسك ” نسخة لأناقة الطالبات و الموظفات “ !!


نسخة خاصة للدراسة ان شاءالله تستفيدوا منها مثل الاولى
عن اساسيات الدولاب لأناقة الطالبات و الموظفات
و مرفق بالتدوينة ايضاً قائمة لأساسيات الدولاب جاهزه للطباعة !










بسم الله الرحمن الرحيم
السلام عليكم ورحمة الله وبركاته




بالبداية مافكرت اني اعمل هالنوع من التدوينات ماعرف احس كثير اتكلم فيها
خصوصاً مسألة الميك اب و التنسيقات .. لكن بما ان انطلب مني كثير استحيت اقول لاء
والي خلاني شخصياً اتشجع ان كثير عجبهم اول تدوينة كتبتها عن اساسيات الدولاب 
وماشاءالله حقق عدد مشاهدات عالية مرا
 فقلت اعمل نسخة خاصة للدراسة ان شاءالله تستفيدوا منها مثل الاولى 

زي ماقلت بالبداية ماراح ادخل بمجال عرض التنسيقات الا الخاصة فيا
 لان صار نقدر نوصلها كلنا باسهل الطرق ولو ماتعرفوا كيف
 شوفوا هالتدوينة " هــنـــا 
تكلمت عن طريقة اخذ افكار للتنسيقات باخر جزئية .


السلسلة راح تكون من وحدة زيكم بتعيش الجو الدراسي
 و راح اخلي السلسلة ان شاءالله منوعة بين الفاشن و الادوات المكتبية
و احتمال كبير بالتغذية لان انا انسانه تهمني معدتي جداً وقت الدراسة و لازم تكون مليانه لوول
و راح تكون بفترات منوعة بما ان الدراسة ماخدة نص حياتنا * ابدا ماني زعلانه XD *



فـ ان شاءالله تفيدكم هالسلسلة وتكون ممتعة, لاتنسوا تتابعوا مدونتي على Bloglovin
عشان يوصلكم اخر التدوينات و تكونوا معايا اول باول  أضغطِ هــنـــا 






 عموما قبل ابدا بأي شيء حابة اقول اشياء بسيطة للطالبات
 بشكل عام سواء كنتِ جامعية او لاء :

 كثير بنات صرت الاحظ يهتمون بالميك اب و ايش موضة الشنط و و و .. الخ
, وهي حتى ماتخرجت من الثانوي !!
اوكي اعترف اني فرحت لما صرت اشوف بنات بالعمر هذا يهتمون بنفسهم و بأناقتهم لكن حقيقي
انتي بمدرسة احلى ايامك تقضيها ببساطة بدون تكلف و تتعبي بشرتك مع الحر و الميك اب 
خليكم مهتمين باشياء بسيطة مثل شنطة انيقة لايقة مع الشوز تبعك و مريولك , عطر خفيف حلو
.. تبدأي تهتمي بنظافتك الشخصية و خصوصا بشرتك بس , هذه الاشياء لو عملتيها مرا بيرفكت
و انتو لسى بمرحلة نمو احتمال كبير تسرعي من ظهور حبوب بوجهك و دنيا انتي في غنى تام عنها .




 الشيء الثاني المهم اتكلم عنو و اتمنى تبطلوا تقلدوا بعض بكل شيء
زي مانعرف بالجامعات و المعاهد في تخصصات كثير بعضها يفرض عليك تتعلمي بطريقة عملية
يعني مثل تخصصات تصميم الديكور , الفنون , تصميم الأزياء , و طالبات السنة التحضيرية
احتياجاتهم غير عن باقي التخصصات خصوصا بما يخص الملابس , الشنط .. الخ
يعني مو من المعقول اشوف طالبة بالفنون لابسة شنطة صغيرة للسهرة
 و نص عفشها بكيس بيدها !
ليه انتي مو مضطرة عشان الكشخة او تقليد بنات تخصصاتهم ماتخليهم يشيلوا عفش معاهم
مو عذر تكسري كتفك  وظهرك عشان خاطر تعجبي الناس
 , و علماً ان في موديلات شنط كبيرة ع الموضة
, سؤالي ليه التعب و التأنق بطريقة غلط ممكن تأثر سلباً عليكي بدال مايكون بفوائد لك ؟!



 للبنات الي مايعرفوا نظام المكان الي راح يدرسوا او يشتغلوا فيه
, نصيحتي لك لا تتهوري تشتري اشياء ممكن تكون ممنوعة و تكوني كلفتي ع نفسك 
بشيء ماراح تلبسي من ضمنها انظمة الشنط و الشوزات لبنات المدارس
 لان احيانا فيه مدارس مرا شديدة بخصوص هالموضوع 
, انا افتكر بمدرستي كان ممنوع الفلات فـ عشان كذا لازم تعرفوا النظام اول 
في بنات كثير صادفتهم يشتكوا انهم جهزوا لبس بالنهاية ممنوع
مثل تي شيرتات عليها رسوم  .. لذلك لا تتسرعوا و السوق ماراح يطير !


 و شيء مهم جداً حابه انبهه عليه  لا تلبسوا شيء عليه القيمة
 بمكان الدراسة او العمل , سواء كان لها قيمة شخصية او بمبلغ وقدرة 
لان في احتمال كبير تفقديهم او تتسرق وماننكر هالشيء
 لان تحصل كثيير للأسف و غالبا لما يكون بجامعة
من المستحيلات تقدري ترجعيهم ثاني مرا مع العدد الضخم من طالبات
 .. طبعا استثني الجزم و الشنط .




’ في هذه التدوينة راح اتكلم بشكل عام عن الأساسيات
 بالملابس و الشنط و الأكسسوارات  بما يتناسب مع :
[ طالبات جامعيات - موظفات - طالبات بالمراحل الثانوية و المتوسطة ]


و بما اني سبق نزلت تدوينة عن اهم الاساسيات الي المفروض تكون عند كل وحدة 
و صدقوني لو عندكم هذه القطع بتكوني ارتحتي من انك تتجهزي ثاني بنسبة 50% 
ولو كنتِ زيي تحبي تفصلي بين لبس الدوام و لبس العادي فـ برضوا ماراح تتعبي بالقطع البيسك
 وهذه هي التدوينة الي سبق نزلتها :


Wardrobe Essentials | اساسيات يجب ان تكون في خزانه ملابسك !!





 بخصوص القائمة أو Checklist :

 بما ان عجبتكم فكرة القائمة أو Checklist الجاهزة للطباعة
 في تدوينة اساسيات في خزانة ملابسك الاولى
فـ راح تكون هالمره نسخة تناسب الجميع بحيث اني خليتها فارغة لكم
بس مقسمتها بالشكل السابق , يعني راح تشوفي بالتدوينة الأساسيات بشكل عام
 و انتي على احتياجاتك تكتبيهم و تعملي تشيك لما تخلصيهم
و مو شرط كل الاساسيات الي بالتدوينة تبيها او محتاجتها بس كتبتها عشان اغطي
اكبر قدر ممكن يفيد الجميع بدون ذكر الألوان عشان اعطي خيار مفتوح لكم
, و راح تحصلوها بأخر التدوينة  .





 ملاحظة اخيرة قبل ما ابداء 

القطع الي حاطتهم بالصور مو شرط انكم تمشوا على نفس الشكل 
انا عرضتهم فقط للتوضيح ان شكلها بالمجمل زي الصورة بس غالبا التصاميم و الخامات تتغير 
كمثال عندكم شنطة الـ Tote مو شرط تكون بطول او عرض معين
 او لازم تكون مفتوحة بدون سحاب لا ابدا لها اشكال كثيرة بس ميزة  الـ Tote باق 
انها تكون كبيرة و بقصات خارجية شبهه هندسية و هذا القصد بالأخير .






 قائمة الأساسيات راح تكون لكل من  :
الأزياء - الأكسسوارات - الأحذية ]


و زي مانعرف لكل مكان اللبس المناسب له و لان لبسك يدل على احترامك
 للمكان الي انتي فيه  و لان هوا مكان مو للأستعراض
 فـ حطي ببالك ان ماتكلفي ع نفسك باللبس و الأكسسوارات كمان
من الناحية الشكلية و ممكن المادية كمان !

لان حرام نص الخامات الغالية ماتتحمل الحرارة و الكرف
 خصوصا لو كنتِ طالبة بدوام كامل 
انا اشوف البعض فاهم غلط ان لو دفعتي مبلغ وقدرة ع القطعة يعني يتحمل
الفكرة هذه لازم تختفي من الوجود  .. الخامة هي الي تقرر مو فلوسك والله لوول !



 بأختصار بعد هالكلام اهتموا دائما بما يخص أشياء العمل او الدراسة
بالنقاط هذه بشكل اجمالي :
 الراحة .
 تلبي احتياجك .
 الشكل المقبول و الأنيق الي يناسب مكان عمل و دراسة .
سواء كان ملابس , او شنط , او اكسسوارات .






[ القمصان  |  Blouse & Shirts ]

القمصان حلو تكوني منووعة فيها و عندك خيارات كثيرة 
لذلك الافضل تشتري مثلا بس 3 تنانير بالوان محايدة راح تتنسق بكل سهوله
 مع باقي القمصان و السترات الي عندك
و تختصري مكان بالدولاب و يكون لعبتك بالاكسسوارات اكثر


من القمصان و التوبات الاساسية  :



Basic Tank Top |  توب بدون اكمام 





Classic T-shirt  |  تي شيرت 






Chiffon Blouses |  قمصان شيفون





long sleeved tee shirt  |  شيرت ضيق باكمام طويلة 





Classic Polo shirt  |  قميص بولو







striped boatneck  |  شيرت مخطط بفتحة رقبة واسعة





sweatshirt |  سويتر شيرت 










السترات | Jackets  ]



القطع هذه جداً مهمة ان تكون عندك خصوصا لو كنتِ انسانة تبردي بسرعة 
لازم يكون معاكي جاكت احتياط بس افضل الكارديغان
 يدفي وبنفس الوقت تقدري تشيلي بشنطتك بدون ماياخد حيز فيه
, من الجاكيتات الي تعتبر شيء اساسي عندك هي :


Denim jacket |  جاكيت الجينز 




 Cardigan |  كارديغان 







Classic Blazer  |  جاكيت البليزر الكلاسيك 




لاتنسوا يكون عندكم الكارديغان بالوان محايدة لانها راح تتنسق مع اشياء كثير
 مثل البيج – الابيض - الاسود
و بالنسبة للبليزر لازم تكون باقمشة خفيف نوعا ما مو ثقيلة عشان
 تناسب دوام طويل خصوصا الي منطقتها حارة
و تقدروا تشتروا اللون الاسود و اللون ثاني بارز مثل الوردي , السماوي , اصفر 
دارجين موضة وتناسب الصباح .








البناطيل | Pants  ]


اعتقد مافي احد ماعندوا هالقطعه بالدولاب , لكن ليش ذكرته ضمن الاساسيات 
لأن في طالبات طب و التخصصات الي مسموح فيها البناطيل
 لازم يكون عندهم هالقطعه و الي افضل للكل ان بناطيل او ملابس الدوام
 بشكل عام تنفصل تماما عن ملابسك العادية 
عشان لما تنكرف بزيادة ماتكوني مستخسرة فيها شيء
 وتقدري تتخلصي منها بضمير مرتاح لوول XD

عموما من البناطيل الأساسية الي لازم تكون عندك :



Black pant |  بنطلون أسود 






Jeans | الجينز





khakis pant |   بنطلون كاكي او لون اغمق 








[ التنانير |  Skirts  ]



التنورة تعتبر من ابسط و اسهل الخيارات بالشراء 
و اكيد لازم تشتريها بالوان محايدة  , تقدري تشتري تنورة سودا قطعتين
 تنورة قطنية و تنورة شيفون مبطن او أي خامة ثانية 
و هذا الشيء يرجع لك و لمعرفتك لو انتي راح تستهلكي اللون الاسود كثير
 يفضل تشتري قطعتين مرا وحدة او اي لون ثاني .

 التنورة الطويلة زي مانعرف لها موديلات في الكلوش ,بكسرات , بخصر عالي ..الخ
حاولي تكون بسيطة جدا والاهم تناسب جسمك لكن بشكل عام 
التنورة بالكسرات لازم تكون الكسرات صغيرة عشان تناسب النهار
 , و الخصر العالي جميل خصوصا لو حابه تستغلي الكروب توب الي عندك
 و كمان تناسب الاجسام البتيت راح توحي بطول لجذعهم
, و تنانير الكلوش تكون ع خفيف مو مرا اوفر و الاوفر يزيد حجمك فانتبهوا .

بالنسبة للي يسأل لو التنورة الجينز لسى دارجة اكيد بس تصميم بسيط خالي
 من التفاصيل و الطبعات.












[ الفساتين |  Dresses ]


الفستان الكاجوال اكيد القطعة الثانية المهمة برأيي والي من ضمنها
 الفستان الماكسي خالي من التفاصيل تماما 
جميل و مريح باللبس بشكل كبير لكن انتبهوا ماتكون ضيقه على اجسامكم مرا
 او نوعية القطن مثلا تكون خفيفه مرا لدرجة تبين جسمك لان راح تعتبر من المحظورات
افضل تشتري منو ثلاثة الوان اسود , بيج , رمادي او فيكي تستبدلي اللون البيج بشيء اغمق 











[ الحقائب |   The Bags ]


الموضوع المهم هنا هوا تصميم الشنطة و حجمها للدوام
الشنطة لازم تكون مريحة لك و تشيل اغراضك و اكبر غلطة ممكن اشوفها
كلتشات و شنط صغيرة جدا للدوام
 حتى لو انك موظفة مستحيل ماعندك شيء تحطي بالشنطة !

اوك في بعض الجامعات و المدارس عاملة نظام اللوكر او الخزنات للطالبات
 فـ ممكن في هذه الحالة  ان تصغري بحجم الشنطة لكن مستحيل توصل لكلتش
, او خلينا نفترض كمان في بنات تحط كل عفشها باللوكر 
و تاخذ شنطة صغيرة تعلقها ع كتفها فيها جوالها و اشياء مهمة
 لكن مو كلتش بليز هذي مزحة ثقيلة اشوفها كثير لوول

يعني بشكل عام :

•  الشنط الأساسية للدوام راح تكون منوعة حسب احتياجك انتِ .

•   الطالبات الي كتبهم كثيرة ياخذو شنط الظهر افضل لهم من شنط اليد لان
 راح تسبب الم كبير بالكتف  و الظهر
و الكلام هذا عن تجربة شخصية و طبية لذلك انتبهوا من هالشيء لصحتكم .

•  لو كنتِ انسانة دفشة مع الشنط  و تحبي ترميها بكل محل افضلك تدفعي عليها شويا
وتجيبي شيء يتحمل و تبعدي عن الفواتح و الخامات الخفيفة .




’ المواصفات المهمة في شنطة الدوام  :

•   تكون مريحة 

•    تلبي احتياجك بمدى سعتها لأغراضك يعني بعضها تكون كبيرة بالطول بس العرض لا 
•   تكون بالوان غامقة عشان ماتبهذلك بمنظرها لو توصخت
 و تقطعيها من كثر الغسيل *معانه سابقة *

•   الخامة تتحمل الأستعمال اليومي مثل الجلد , البلاستك , القماش المتين .

•   تكون خالية من الترتر و الاشياء البارزة عشان ماتتشوه
 لو طاحت من مكانها بسبب الاستخدام المتكرر.




’ انواع الشنط الي تناسب الدوام :





satchel bag | شنطة الساتشل
 " تتميز بحجمها المتوسط للكبير و فيها جيوب و طريقتين لحملها "


Duffel &  travel Bag | حقيبة كبيرة للسفر أو للجيم
 " غنية عن التعريف و بتشيل اكثر تناسب الطالبات الي مضطرين
يشيلوا اشياء كثيرة مثل طالبات الفاشن و الفنون وهي اكبر من الحجم الي بالصورة "

Bucket Bag | شنطة الباكيت أو الدلو
" من الشنط الغنية عن التعريف ايضاً رجعت بقوة مع الستايل الرياضي
 و التسعينيات و هي عملية جداً "

backpack | شنطة للظهر
" برضوا غنية عن التعريف اتميزت بتصاميم و خامات متنوعة تناسب
 جميع الاعمار و الاحتياجات "








Tote bags  | شنط الـ Tote  
"باحجام كبيرة وتصميم بسيط جداً تتميز بكثرة المواد الي مصنوعة منها
 ابرزهم الجلد - البلاستيك تدوم اكثر و انتبهوا ماتكون المسكة صغيرة مرا  "







 [ الأحذية | Footwear ]


اكيد التدوينة ماراح تخلى من هالجزئية المهمة 
زي مانعرف الجزم انواع و اشكال و هي تعتبر زي الشنط تختاري
 الي تتناسب مع احتياجك سواء بالحركة او لسبب طبي 
فـ لو كنتِ طالبة طب او طالبة بجامعة كبيرة زي عبدالعزيز لازم تنتبهي
 لجزمتك تكون مساعدة لك و ماتكون سبب لمشاكل اكثر لك 
انا مو ضد الفلات  او الصنادل لكن حاولوا قد ماتقدروا تخففوا منو
 و تنتبهوا لنوعيتها بشكل عام يكون فيها اضافة البادس او الوسادة
 خصوصا لما يكون اساسها قاسي من الخشب راح تألم رجولكم جداً 
فـ ممكن انتي تشتري البادس كأضافة خارجية و تحطيها بجزمك
  و تلاقوها بمحلات الاحذية و الصيدليات 

  السبب الثاني الي مايخليني احب الصنادل و الفلات  لو انتي بمكان تتعرضين لشمس 
 راح تسمر لك المنقطة الي ظاهره من رجولك و الباقي يكون باللونك الطبيعي 
ولكي ان تتخيلي المنظر لما تفصخي الصندل او الفلات دمار نفسي لوول p;
و ماراح اتكلم عن الكعب العالي شيء راجع لكم خصوصا للموظفات او الطالبات
 الي ماراح يمشوا كثير  و ارضيتهم رائعة خدوا راحتكم بس مو بجامعة عبدالعزيز
لكن على اي حال لا تزعلوا حطيت نوعية كعب تناسب الدوامات D:


 عموما هذه افضل الخيارات للأحذية الي تناسب الدوام 
بالصورة مع ذكر الاسم معاها :












[  إلاكسسوارات | Accessories ] 


و الأكسسوارات لازم تراعوا انكم في الصباح و بعز الظهرية
يعني ابدا مو شيء عقلاني الوحدة تلبس اكسسوار كلو تفاصيل و زحمة
 و مليان كرستالات مرا اوفر  , ازعاج للعين بصراحة !
 و خصوصا لو انتِ مضطرة تتعلمي بطريقة عملية حاولي ماتكثري اكسسوار بيدك 
عشان تاخذي راحتك و ماتقعدي تشيليهم وترجعيهم ثاني مره
 والي ممكن تخليكي تفقديهم معاناة سابقة*


 راعو تكون تصاميم الاكسسوارات خفيفة بالوان فرايحية و مافيها لمعه كثيرة
, فيكم تكثروا بالأكسسوارات من ناحية الشراء خصوصا لو راح تشتروا
اغلب قطع الملابس بالوان محايدة  فـ راح يكون بالاغلب لعبتكم  بالاكسسوارات




 هذه اساسيات الأكسسوارات و فيكم تضيفوا اشياء
 زيادة من عندكم لو حابين :






1) Sunglasses  | نظارة شمسية

2) Boyfriend Watch  | ساعة البوي فيرند

3) compact folding Umbrella  | المظلة المطوية  او القابلة للطي








4) Statement necklace | سلاسل الستيتمنت 

5) Tiny Necklace | سلاسل بتعليقات صغيرة سواء احجار كريمة او غيرها

6) beaded necklace - bracelet | سلاسل و اساور من الخرز

7) Long Layered Necklaces | سلاسل طويلة طبقات أو متعددة


 حاولوا تكون نظاراتكم الشمسية خالية من التفاصيل الكثيرة لو راح تلبسوها للدوام وخصوصا المزينة بالكيرستالات بشكل اوفر
 ولو كنتِ تحبي التغيير كثير بالنظارات لا تشتريهم بسعر غالي
 عشان تقدري تاخدي راحتك بالتنويع  
, بالنسبة للمظلة شيء مرا مهم لو كانت جامعتك كبيرة و راح تتعرضي للشمس
و اعتقد بنات جامعة عبدالعزيز السليمانية يعرفوا العذاب الحقيقي تحت الشمس الساطعة
تقدروا تحصلوا المظلات الصغيرة باشكال جميلة باغلب
 الاماكن مثل الدانوب و كليرز  .. الخ
, طبعا ماذكرت الاكسسوارات الذهبية و الفضية الي اكيد من الاساسيات
 بس حسيت انو شيء متواجد من قبل عندنا كلنا فحبيت اركز ع اشياء ثانية راح تفيدكم .








Wardrobe Essentials Checklist  | قائمة اساسيات الخزانة ]


(( أضغطِ على الصورة للتكبير ))






The End


و تابعوني على  | Follow Me :

     ]




Share:
Post a Comment
Blog Design Created by pipdig